ახალციხის მუნიციპალიტეტის 2023 წლის ბიუჯეტის პროექტის საჯარო განხილვა

დღეს, ახალციხის მუნიციპალიტეტის 2023 წლის ბიუჯეტის პროექტის საჯარო განხილვა გაიმართა, რომელსაც ადგილობრივი თვითმმართველობის, არასამთავრობო სექტორის, მედიის წარმომადგენლები და დაინტერესებული მოქალაქეები ესწრებოდნენ.

შეხვედრას ახალციხის მუნიციპალიტეტის საკრებულოს თავმჯდომარე დავით ლომიძე უძღვებოდა. მერმა ირაკლი ლაზარაშვილმა და მერის პირველმა მოადგილემ ილია ზარდიაშვილმა დეტალურად ისაუბრეს მომავალი წლის პრიორიტეტებზე და გეგმებზე.

ბიუჯეტის პროექტი და მისი ძირითადი პარამეტრები აუდიტორიას ახალციხის მუნიციპალიტეტის მერიის საფინანსო-საბიუჯეტო სამსახურის ხელმძღვანელმა გელა ლომიძემ გააცნო.

ახალციხის მუნიციპალიტეტის მომავალი წლის ბიუჯეტი 29 მილიონი ლარით განისაზღვრა, მთავარ პრიორიტეტებად კვლავ ინფრასტრუქტურის, ჯანდაცვის, სოციალური, კულტურის, განათლების, სკოლამდელი აღზრდის მიმართულებები რჩება. საუბარი შეეხო მოსახლეობის მუნიციპალური ტრანსპორტით უზრუნველყოფის მიზნით განსახორციელებელ ღონისძიებებს, სხვადასხვა სახის ინფრასტრუქტურული პრობლემების მოგვარებას, ჯანდაცვისა და სოციალური პროგრამების დაფინანსების გაზრდას, მოსახლეობის აქტიური ჩართულობის აუცილებლობას და სხვა.

შეხვედრაზე ბიუჯეტის პროექტთან დაკავშირებით საკუთარი მოსაზრებები და შეხედულებები გამოთქვეს ადგილობრივი თვითმმართველობის, არასამთავრობო ორგანიზაციების და საზოგადოების წარმომადგენლებმა. დამსწრეთა დასმულ კითხვებს უპასუხეს მერმა ირაკლი ლაზარაშვილმა, პირველმა მოადგილემ ილია ზარდიაშვილმა და საკრებულოს თავმჯდომარემ დავით ლომიძემ. აღინიშნა, რომ გაჟღერებული წინადადებები და ინიციატივები მაქსიმალურად იქნება გათვალისწინებული მომავალი წლის სამოქმედო გეგმაში.

+12